قصيدة الطالبة سالى سيد هشام التى انتقدت الرئيس مرسى وتم تحويلها للتحقيق
سالي: هجوت مبارك فصفق لي الإخوان.. وانتقدت مرسي فحولوني للتحقيق
قالت الطالبة سالي السيد هاشم، التي كتبت قصيدة هجاء ضد الرئيس محمد مرسي، إنها كتبت شعرا ينتقد الرئيس السابق، محمد حسني مبارك، قبل الثورة، فصفق لها مدرسوها المنتمين للإخوان المسلمين، مشيرة إلى أنها عندما انتقدت مرسي بنفس الطريقة في الوقت الحالي تم تحويلها للتحقيق.
وأضافت الطالبة بإحدى مدارس محافظة الغربية، في برنامج "من جديد"، على قناة "أون تي في"، أن ما حدث معها كان بسبب القرارات السيادية للمدرسين التابعين لجماعة الإخوان المسلمين بالمدرسة.
من جانبها، قالت فاطمة خضر، وكيل وزارة التربية والتعليم بالغربية، إن الموضوع أخذ أكبر من حجمه إعلاميا، وإن مديرة المدرسة أكدت أن السبب ليس القصيدة بعينها، ولكن إلقاء شعر أو مقالات سياسية في المدارس، موضحة أنه لا يصح الخروج عن مسار التربية والتعليم.
وأوضحت خضر، بمداخلة هاتفية في البرنامج ذاته، أنه لم يتم فصل الطالبة سالي وصديقتها أو تحويلهم للتحقيق، وأن المديرة أشادت بأدب سالي والتزامها بالمدرسة، وأنه تم تكريمها عدة مرات قبل ذلك، مؤكدة أن مدير عام إدارة قام بتحويل مديرة المدرسة للتحقيق.
ودي قصيدة الطالبة / سالى سيد هاشم التى إنتقدت فيها الرئيس مرسى التى عملت مشاكل لها
****************************************************
حــس
حس يا سيادة الريس بينا
حس بالنار اللى والعة فينا
حس بشهيد حلمه ضاع
حس بقهرة أهالينا
ليك رب هتقابله.. طب هتقوله إيه؟ لما يسأل جنابك علينا
حــس
حس بشوارع مليها دم
حس بقهرة أب وأم
حس ببيوت جُواها هم
والقلوب مليها الغم
حس ببلد بتموت
وعز شبابها بيتسم
حــس
حس بجدع عياله جاعت
نزل يوكلهم فكرامته اتباعت
اتسحل واتعرى فى وسط حكومتك
وبعد ده كله حقوقه ضاعت
حــس
ده أنا المصرى ابن البلد
حلمى فى وسط الميدان اتولد
حلمى فى بلدى تعلى لفوق
وحلمى قدامى اتعرى واتجلد
حــس
يا سيادة الريس شرفك فين؟
لما اتعرى المصرى الهمام
لما اتسحل واستغليت إنه راجل جعان
وعاوز تكممه وتكتف عزته
وتهز بلدنا.. بلد الشجعان
لا مش هسكتلك ولا اسيبك تنهش
فى لحم بلدى زى زمان
حــس
ما أصلى خلاص م الموت معودتش بخاف
عارف الموت؟ عارف معناه؟
الموت أحلام بتموت وتضيع
الموت مش بس موت الحياة
الموت صديق عمر يروح
وصاحبه يتوه مجراه
الموت مش بس روح بتطلع
الموت ابن يموت وأمه م تقدر تنساه
الموت أب انكسر ظهره
ابنه كان ظهره وقواه
الموت يعنى مستقبل بيموت ويضيع
وتموت أحلامك وياه
حــس
حق اللى اتعرى يا ريس فين؟
ولا هو اللى عراه أصلا مين؟
اللى عراه ظلم وكدب
اللى عراه حكم مهين
اللى عراه ديابة ملهاش إحساس
اللى عراه كلاب مسعورين
اللى عراه سكوت.. اللى عراه جبروت
اللى عراه سلطة بتكسر عين
(حــس)
ورسالتى أخيرة لنظام جبان
نظام فاسد ملوش عنوان
لو همــوت
لو دمى منك يلاقى الجحود
وتهددنى بسجن ظلام
ولا لوجوده أى وجود
... مش هتسكت فيا الصوت..
... مش هتسكت فيا الصوت..
ليست هناك تعليقات:
إرسال تعليق
جميع التعليقات تعبر عن رأى صاحبها وليست بالضروره تعبر عن رأى صاحب المدونة